ಬೈಂದೂರು: ಕಾಲ್ತೋಡಿನಲ್ಲಿ ಪ್ರಾಚೀನ ಕನ್ನಡ ಶಾಸನ ಪತ್ತೆ

Call us

ಕುಂದಾಪ್ರ ಡಾಟ್ ಕಾಂ ಸುದ್ದಿ
ಕುಂದಾಪುರ: ತಾಲೂಕಿನ ಕಾಲ್ತೋಡು ಗ್ರಾಮದ ಉಂತುನ ಹೊಳೆಯ ಈರಣ್ಣನ ಮಕ್ಕಿಯಲ್ಲಿ 13ನೇ ಶತಮಾನದ ಕನ್ನಡ ಶಾಸನವೊಂದು ಪತ್ತೆಯಾಗಿದೆ. ಶಿವಸ್ತುತಿಯೊಂದಿಗೆ ಪ್ರಾರಂಭವಾಗಿರುವ ಶಾಸನದಲ್ಲಿ ಶಕ ವರ್ಷ 1219 ರ ಉಲ್ಲೇಖವಿದ್ದು, ಅದು ಕ್ರಿ.ಶ. 1293ಕ್ಕೆ ಸರಿಹೊಂದುತ್ತದೆ. ಈ ಬಗ್ಗೆ ಸಂಶೋಧಕ ಎಂ.ಎಸ್.ಆರ್.ಎಸ್. ಕಾಲೇಜಿನ ಸಹ ಪ್ರಾಧ್ಯಾಪಕ ಪ್ರೊ. ಟಿ. ಮುರುಗೇಶಿ ಕುಂದಾಪ್ರ ಡಾಟ್ ಕಾಂ ಗೆ ತಿಳಿಸಿದ್ದಾರೆ.

ಪತ್ತೆಯಾಗಿರುವ ಶಾಸನದಲ್ಲಿ ಶ್ರೀ ಮತ್ಪ್ರಾಪ ಚಕ್ರವರ್ತಿ ದೇವರ‍್ಸ ಎಂಬ ಹೆಸರನ್ನು ಗುರುತಿಸಲಾಗಿದೆ. ಆದರೆ ಶಾಸನದ ವಿವರಗಳಿಂದ ಈ ದೇವರ‍್ಸ ಯಾರು ಎಂದು ಸ್ಪಷ್ಟವಾಗುವುದಿಲ್ಲ. ಶಾಸನೋಕ್ತ ಕಾಲದಲ್ಲಿ ನಾಗದೇವರ‍್ಸ ಎಂಬ ಆಳುಪ ದೊರೆ ತುಳುನಾಡಿನಲ್ಲಿ ಆಳ್ವಿಕೆ ನಡೆಸುತ್ತಿದ್ದ ಮಾಹಿತಿ ಇತರೆ ದಾಖಲೆಗಳಲ್ಲಿ ದೊರೆಯುತ್ತದೆ. ಆದ್ದರಿಂದ ಶಾಸನೋಕ್ತ ದೇವರ‍್ಸ ಆಳುಪ ದೊರೆ ನಾಗದೇವರ‍್ಸನೆಂದು ಭಾವಿಸಬಹುದಾಗಿದೆ. ಈತನ ಆಳ್ವಿಕೆಯ ಕಾಲದಲ್ಲಿ ಹೇರಳಿಯ ಅಂದರೆ ಈಗಿನ ಹೇರಂಜಾಲುವಿನ ಹೆಬ್ಬಾರಿಯರ ಮಠಕ್ಕೆ ಕೊಟ್ಟ ಭೂಮಿ ದಾನವನ್ನು ಶಾಸನದಲ್ಲಿ ದಾಖಲಿಸಲಾಗಿದೆ. ಶಾಸನದ ಕೊನೆಯಲ್ಲಿ ಶಾಪಾಶಯವಿರುವ ಬಗ್ಗೆ ತಿಳಿಸಲಾಗಿದೆ.

Call us

ಶಾಸನದ ಮೇಲ್ಭಾಗದಲ್ಲಿ ಶಿವಲಿಂಗ, ಎಡಬಲದಲ್ಲಿ ಎರಡು ನಂದಿಯ ಶಿಲ್ಪಗಳು, ತ್ರಿಶೂಲ, ದೀಪ, ಯೂಪ (ಬಲಿ ಪೀಠ) ಹಾಗು ನಿಧಿಕುಂಭದ ಉಬ್ಬುಶಿಲ್ಪಗಳಿವೆ. ಬಟ್ನಾಡಿಯ ರಾಮಯ್ಯ ಶೆಟ್ಟಿ ಈ ಶಾಸನದ ಇರುವಿಕೆಯನ್ನು ಗುರುತಿಸಿದ್ದು, ಕೊಲ್ಲೂರಿನ ಮುರುಳೀಧರ ಹೆಗ್ಡೆ ಮತ್ತು ರಾಘವೇಂದ್ರ ಐತಾಳ್ ಈ ಶಾಸನದ ಅಧ್ಯಯನಕ್ಕೆ ಸಹಕರಿಸಿದ್ದಾರೆ. ದ್ವಿತೀಯ ಬಿ.ಎ. ಪುರಾತತ್ವ ವಿದ್ಯಾರ್ಥಿಗಳಾದ ಅನಿಲ್, ರಾಜೇಶ್, ವಿಘ್ನೇಶ್, ಲೋಹಿತ್ ಮತ್ತು ಅಂತಿಮ ಎಂ.ಎ. ಪುರಾತತ್ವ ವಿದ್ಯಾರ್ಥಿ ಸುಭಾಷ್ ಹಾಗೂ ಉಂತುನ ಹೊಳೆಯ ಗೋಪಾಲ್ ಮತ್ತು ಕೊಠಾರಿ ಮನೆಯವರ ಶಾಸನವನ್ನು ಪ್ರತಿ ಮಾಡುವಲ್ಲಿ ಸಹಕಾರಿಸಿದ್ದಾರೆ.

[quote font_size=”15″ bgcolor=”#ffffff” bcolor=”#d6d6d6″ arrow=”yes”]ಶಾಸನೋಕ್ತ ಹೆಬ್ಬಾರಿಯರ ಮಠವನ್ನು ಈಗ ಹೇರಂಜಾಲು ಮಠವೆಂದು ಕರೆಯಲಾಗುತ್ತದೆ. ತುಳುನಾಡಿನ ಹೆಬ್ಬಾರರು ಮೂಲತಃ ಕಂದಾವರದ ಕುಲಕ್ಕೆ ಸೇರಿದವರು, ಪ್ರಸ್ತುತ ಹೇರಂಜಾಲು ಮಠದ ಉಡುಪರ ಕುಲದೇವರು ಕಂದಾವರದ ಕಾರ್ತೀಕನೆ. ಆದರೆ ಹೇರಂಜಾಲು ಮಠದ ಆರಾಧ್ಯ ದೇವತೆ ಶ್ರೀಲಕ್ಷ್ಮಿ. ಲಕ್ಷ್ಮಿಯೂ ಮೂಲತಃ ಶೈವ ದೇವತೆಯೇ. ಶಾಸನದಲ್ಲಿನ ನಿಧಿಕುಂಭದ ಉಬ್ಬುಶಿಲ್ಪ ಸಹ ಮಠದ ಆದಿಲಕ್ಷ್ಮಿಗೆ ನೀಡಿದ ದಾನವೆಂಬುದನ್ನು ಸ್ಪಷ್ಟಪಡಿಸುತ್ತದೆ. ಶಾಸನೋಕ್ತ ಹೆಬ್ಬಾರಿಯರ ಮಠ ಆದಿಶಕ್ತಿ ಆರಾಧನೆಯ ಕರ್ನಾಟಕದ ಅತ್ಯಂತ ಪ್ರಾಚೀನ ಮಠ ಎನ್ನುವುದು ಈ ಶಾಸನದ ಮಹತ್ವದ ವಿಷಯವಾಗಿದೆ.  -ಪ್ರೊ. ಟಿ. ಮುರುಗೇಶಿ, ಇತಿಹಾಸ ಮತ್ತು ಪುರಾತತ್ವ ವಿಭಾಗ, ಎಂ.ಎಸ್.ಆರ್.ಎಸ್. ಕಾಲೇಜು, ಶಿರ್ವ [/quote]

ancient inscription discovered in Kalthodu - Byndoor (2) ancient inscription discovered in Kalthodu - Byndoor (3)

Leave a Reply

Your email address will not be published. Required fields are marked *

one × 5 =