ಕುಂದಾಪ್ರ ಡಾಟ್ ಕಾಂ ಸುದ್ದಿ.
ಕುಂದಾಪುರ: ಟಿವಿ ರಿಚಾರ್ಜ್ ಮಾಡುವ ಹೆಸರಿನಲ್ಲಿ ಸೈಬರ್ ಕಳ್ಳರು ಲಿಂಕ್ ಕಳುಹಿಸಿ, ಕುಂದಾಪುರದ ಚಿಕ್ಕನ್ ಸಾಲ್ ರಸ್ತೆಯ ವಿವೇಕಾನಂದ ಕೋಟೆಗಾರ್ (61) ಹಾಗೂ ಅವರ ಪತ್ನಿಯ ಬ್ಯಾಂಕ್ ಖಾತೆಯಲ್ಲಿದ್ದ 1.88 ಲಕ್ಷ ರೂ. ಹಣವನ್ನು ಯಾರೋ ಸೈಬರ್ ವಂಚಕರು ಮೋಸ ಮಾಡಿ ಲಪಟಾಯಿಸಿದ ಘಟನೆ ಬೆಳಕಿಗೆ ಬಂದಿದೆ.
ವಿವೇಕಾನಂದ ಅವರು ಸೆ.12 ರ ಬೆಳಗ್ಗೆ ಮೊಬೈಲ್ನಲ್ಲಿ ಟಾಟಾ ಸೈ ವೆಬ್ಸೈಟ್ಗೆ ಹೋಗಿ ಹುಡುಕಿದಾಗ 06009616528 ನಂಬರ್ ಇದ್ದು, ಅದಕ್ಕೆ ಕರೆ ಮಾಡಿದ್ದಾರೆ. ಆಗ ಆ ಆರೋಪಿಯು ಟಾಟಾ ಸೈ ಕರೆನ್ಸಿ ದರ ಕಡಿಮೆಯಿದ್ದು, ರಿಚಾರ್ಜ್ ಮಾಡಿಸಿ ಎಂದು ಹೇಳಿದ್ದ. ಅದರಂತೆ ಇವರು ಪತ್ನಿ ಬಳಿ ರಿಚಾರ್ಜ್ ಮಾಡುವಂತೆ ಹೇಳಿದ್ದು, ಅವರು ಈ ಹಿಂದೆ ರಿಚಾರ್ಜ್ ಮಾಡುತ್ತಿದ್ದ 209 ರೂ. ಹಾಕಿದ್ದಾರೆ. ಆಗ ಆ ಆರೋಪಿಯು ನೀವು ಈಗ ರಿಚಾರ್ಜ್ ಮಾಡಿದ ಹಣ ನನ್ನ ಸಿಸ್ಟಮ್ನಲ್ಲಿ ತೋರಿಸಲು ತಡವಾಗುತ್ತದೆ. ಅದಕ್ಕೆ ನಾನು ಲಿಂಕ್ ಕಳುಹಿಸುತ್ತೇನೆ, ಅದರಲ್ಲಿ ರಿಚಾರ್ಜ್ ಮಾಡಿದರೆ ಕೂಡಲೇ ರಿಚಾರ್ಜ್ ಆಗುತ್ತದೆ. ಈಗಾಗಲೇ ರಿಚಾರ್ಜ್ ಮಾಡಿದ ಹಣ ಕೂಡ ಅದಕ್ಕೆ ಸೇರುತ್ತದೆ ಎಂಬುದಾಗಿ ಹೇಳಿ ಲಿಂಕ್ ಕಳುಹಿಸಿದ್ದ.
ವಿವೇಕಾನಂದರು ಅದನ್ನು ನಂಬಿ ಆ ಲಿಂಕ್ ಅನ್ನು ಕ್ಲಿಕ್ ಮಾಡಿ, ಮತ್ತೆ 525 ರೂ. ಹಾಕುವಂತೆ ಪತ್ನಿಗೆ ತಿಳಿಸಿದ್ದು ಅದರಂತೆ ಹಣವನ್ನು ಯುಪಿಐ ಮೂಲಕ ಕಳುಹಿಸಿದ್ದರು. ಅನಂತರ ಆತನು ವಿವೇಕಾನಂದರಿಗೆ ಕರೆ ಮಾಡಿ, ಬೇರೆ ಏನಾದರೂ ಸರ್ವಿಸ್ ಬೇಕೆ ಎಂದು ಕೇಳಿದ್ದು, ಆಗ ಇವರು ಟಾಟಾ ಸ್ಟ್ಗೆ ರಿಜಿಸ್ಟರ್ ಆಗಿರುವ ಮೊಬೈಲ್ ನಂಬರ್ ಬದಲಾಯಿಸುವಂತೆ ತಿಳಿಸಿದ್ದಾರೆ. ಅನಂತರ ಆತನು ಇವರ ವಾಟ್ಸಾಪ್ ಗೆ ಲಿಂಕ್ ಕಳುಹಿಸಿ ಹಾಯ್ ಎಂದು ಮೆಸೇಜ್ ಮಾಡಲು ತಿಳಿಸಿದ್ದು, ಇವರು ಹಾಗೆಯೇ ಮಾಡಿದ್ದಾರೆ.
ಸೆ.12 ರ ಸಂಜೆ ಆತ ವಿವೇಕಾನಂದರಿಗೆ ವಾಟ್ಸಾಪ್ ಕರೆ ಮಾಡಿ. ಬೇರೆ ಏನಾದರೂ ಸರ್ವಿಸ್ ಬೇಕೆ ಎಂದು ಹೇಳಿದ್ದು, ಇವರು ಬೇಡವೆಂದಿದ್ದರು. ಆದಾದ ಬಳಿಕ ಸುಮಾರು ರಾತ್ರಿ ವಿವೇಕಾನಂದ ಹಾಗೂ ಅವರ ಪತ್ನಿಯ ಮೊಬೈಲ್ನಲ್ಲಿ ಬ್ಯಾಂಕ್ ಖಾತೆಯ ಹಣ ಪರಿಶೀಲಿಸಿದಾಗ ಒಂದು ಬ್ಯಾಂಕ್ ಖಾತೆಯಿಂದ ಗೂಗಲ್ ಪೇ ಮೂಲಕ 86 ಸಾವಿರ ರೂ. ಇನ್ನೊಂದು ಬ್ಯಾಂಕ್ ಬ್ಯಾಂಕ್ ಖಾತೆಯಿಂದ 12 ಸಾವಿರ ರೂ. ಕಡಿತವಾಗಿರುವುದು ಬೆಳಕಿಗೆ ಬಂದಿದೆ.
ಅನಂತರ ಸೈಬರ್ ಸಹಾಯವಾಣಿಗೆ ಕರೆ ಮಾಡಿ ವಿವೇಕಾನಂದರು ದೂರು ನೀಡಿದ್ದು, ಬ್ಯಾಂಕ್ ಕಸ್ಟಮರ್ ಕೇರ್ಗೆ ಕರೆ ಮಾಡಿ, ಬ್ಯಾಂಕ್ ಖಾತೆ ಫ್ರೀಜ್ ಮಾಡಿಸಿ, ಸೆ.15 ಕ್ಕೆ ಬ್ಯಾಂಕಿಗೆ ಹೋದಾಗ ಖಾತೆಯಿಂದ ಮತ್ತೆ 90 ಸಾವಿರ ರೂ. ಗೂಗಲ್ ಪೇ ಮೂಲಕ ಕಡಿತಗೊಂಡಿರುವುದು ತಿಳಿದುಬಂದಿದ್ದು, ಸೈಬರ್ ಸಹಾಯವಾಣಿಗೆ ಕರೆ ಮಾಡಿ ದೂರು ನೀಡಿದ್ದಾರೆ.
ಈ ಬಗ್ಗೆ ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
