ಕುಂದಾಪ್ರ ಡಾಟ್‌ ಕಾಂ ಸುದ್ದಿ.
ಕೋಟ: ಹೂಡಿಕೆ ಮಾಡಿದ ಹಣವನ್ನು ಕೆಲವೇ ದಿನಗಳಲ್ಲಿ ದುಪ್ಪಟ್ಟು ಮಾಡಿಕೊಡುವುದಾಗಿ ನಂಬಿಸಿ ಹೋಟೆಲ್ ಉದ್ಯಮಿಯೊಬ್ಬರಿಂದ 5.76 ಲಕ್ಷ ರೂ. ಪಡೆದು ವಂಚಿಸಿರುವ ಆರೋಪದಡಿ ಮೂವರ ವಿರುದ್ಧ ಕೋಟ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಕುಂದಾಪುರ ತಾಲೂಕಿನ ವಡೇರಹೋಬಳಿ ನಿವಾಸಿ ಪ್ರಕಾಶ್ (38 ವರ್ಷ) ಎಂಬವರು ವಂಚನೆಗೊಳಗಾದವರು. ದೂರಿನ ಆಧಾರದಲ್ಲಿ ಬಸ್ರೂರಿನ ಜ್ಯೋತಿ, ಸಾಲಿಗ್ರಾಮದ ಅಕ್ಷತಾ ದೇವಾಡಿಗ ಹಾಗೂ ಮೈಸೂರಿನ ಹಿರಿಯಪಟ್ಟಣದ ಪ್ರಶಾಂತ್ ಎಂಬವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.
ಉದ್ಯಮಿ ಪ್ರಕಾಶ್ ಅವರು ಕೋಟದಲ್ಲಿ ಹಲವು ವರ್ಷಗಳಿಂದ ಹೋಟೆಲ್ ಉದ್ಯಮ ನಡೆಸಿಕೊಂಡು ಬರುತ್ತಿದ್ದಾರೆ. ಈ ಅವಧಿಯಲ್ಲಿ ಬಸ್ರೂರು ನಿವಾಸಿ ಜ್ಯೋತಿ ಎಂಬವರು ಅವರಿಗೆ ಪರಿಚಯವಾಗಿದ್ದರು. ತಮ್ಮ ಬಳಿ ವಿವಿಧ ಹಣಕಾಸು ವ್ಯವಹಾರಗಳು ಹಾಗೂ ಹೂಡಿಕೆ ಮಾಡಿದ ಹಣವನ್ನು ದುಪ್ಪಟ್ಟು ಮಾಡುವ ಯೋಜನೆಗಳಿವೆ ಎಂದು ಜ್ಯೋತಿ ತಿಳಿಸಿದ್ದರು.
ಈ ಯೋಜನೆಗಳಲ್ಲಿ ಹಣ ಹೂಡಿದರೆ ಕಡಿಮೆ ಅವಧಿಯಲ್ಲಿ ಉತ್ತಮ ಲಾಭ ದೊರೆಯುತ್ತದೆ ಎಂದು ನಂಬಿಸಿ ಪ್ರಕಾಶ್ ಅವರಿಂದ ಹಂತ ಹಂತವಾಗಿ ಹಣ ಪಡೆದುಕೊಂಡಿರುವುದಾಗಿ ದೂರಿನಲ್ಲಿ ಆರೋಪಿಸಲಾಗಿದೆ.
2025ರ ಜನವರಿ 21ರಿಂದ ಮೇ. 23ರ ವರೆಗೆ ಜ್ಯೋತಿ ಸೂಚನೆಯಂತೆ ಪ್ರಕಾಶ್ ಅವರು ಸಾಲಿಗ್ರಾಮ ನಿವಾಸಿ ಅಕ್ಷತಾ ದೇವಾಡಿಗ ಅವರ ಬ್ಯಾಂಕ್ ಖಾತೆಗೆ ಫೋನ್‌ಪೇ ಮೂಲಕ ಒಟ್ಟು 3,68,000 ರೂ. ಹಂತ ಹಂತವಾಗಿ ವರ್ಗಾಯಿಸಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಇಷ್ಟೇ ಅಲ್ಲದೇ ಜ್ಯೋತಿ ಅವರ ಒತ್ತಾಯದ ಮೇರೆಗೆ ಮೈಸೂರಿನ ಹಿರಿಯಪಟ್ಟಣ ನಿವಾಸಿ ಪ್ರಶಾಂತ್ ಅವರ ಖಾತೆಗೆ ಫೋನ್‌ಪೇ ಮೂಲಕ 58,000 ರೂ. ವರ್ಗಾಯಿಸಿರುವುದಾಗಿ ಆರೋಪಿಸಲಾಗಿದೆ. ಈ ಎರಡು ಖಾತೆಗಳಿಗೆ ಒಟ್ಟು 4,26,000 ರೂ. ವರ್ಗಾವಣೆ ಮಾಡಿರುವುದಾಗಿ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಬ್ಯಾಂಕ್ ಖಾತೆಗಳಿಗೆ ಹಣ ವರ್ಗಾಯಿಸಿರುವುದರ ಜೊತೆಗೆ ಜ್ಯೋತಿ ಅವರ ಕೋರಿಕೆಯಂತೆ 1,50,000 ರೂ. ನಗದು ನೀಡಿರುವುದಾಗಿಯೂ ಪ್ರಕಾಶ್ ದೂರಿನಲ್ಲಿ ತಿಳಿಸಿದ್ದಾರೆ. ಈ ಮೂಲಕ ಬ್ಯಾಂಕ್ ವರ್ಗಾವಣೆ ಮತ್ತು ನಗದು ಸೇರಿ ಒಟ್ಟು 5,76,000 ರೂ. ಹಣವನ್ನು ಆರೋಪಿಗಳು ಪಡೆದುಕೊಂಡಿರುವುದಾಗಿ ಆರೋಪಿಸಲಾಗಿದೆ.
ಹೂಡಿಕೆ ಮಾಡಿದ ಹಣವನ್ನು ಕೆಲವೇ ದಿನಗಳಲ್ಲಿ ಲಾಭಾಂಶದೊಂದಿಗೆ ದುಪ್ಪಟ್ಟು ಮಾಡಿ ಹಿಂದಿರುಗಿಸುವುದಾಗಿ ಭರವಸೆ ನೀಡಲಾಗಿತ್ತು ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಹಣ ಪಡೆದುಕೊಂಡ ಬಳಿಕವೂ ಜ್ಯೋತಿ ಮತ್ತಷ್ಟು ಹಣ ನೀಡುವಂತೆ ಒತ್ತಾಯಿಸಿದ್ದರು. ಆದರೆ ಪ್ರಕಾಶ್ ಅವರು ಹೆಚ್ಚುವರಿ ಹಣ ನೀಡಲು ನಿರಾಕರಿಸಿ, ಈಗಾಗಲೇ ಹೂಡಿಕೆ ಮಾಡಿರುವ ಹಣವನ್ನು ಹಿಂದಿರುಗಿಸುವಂತೆ ಕೇಳಿಕೊಂಡಿದ್ದರು.
ಜ್ಯೋತಿ ಅವರು ಹಣ ವಾಪಸ್ ನೀಡುವ ಬದಲು ಅವಾಚ್ಯ ಶಬ್ದಗಳಿಂದ ನಿಂದಿಸಿ ಬೆದರಿಕೆ ಹಾಕಿರುವುದಾಗಿ ಪ್ರಕಾಶ್ ಆರೋಪಿಸಿದ್ದಾರೆ. ಹಣ ಹಿಂತಿರುಗಿಸದ ಹಿನ್ನೆಲೆಯಲ್ಲಿ ಪ್ರಕಾಶ್ ಅವರು ನ್ಯಾಯಾಲಯದ ಮೊರೆ ಹೋಗಿ ಖಾಸಗಿ ದೂರು ಸಲ್ಲಿಸಿದ್ದರು.
ಈ ಬಗ್ಗೆ ಕೋಟ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
