ಕುಂದಾಪ್ರ ಡಾಟ್‌ ಕಾಂ ಸುದ್ದಿ.
ಕುಂದಾಪುರ: ಸಾಮಾಜಿಕ ಜಾಲತಾಣದಲ್ಲಿ ಪಾರ್ಟ್‌ ಟೈಮ್ ಉದ್ಯೋಗದ ಜಾಹೀರಾತು ನೋಡಿ ಕ್ಲಿಕ್ ಮಾಡಿದ ಮಹಿಳೆಯೊಬ್ಬರು ಸೈಬರ್ ವಂಚಕರ ಜಾಲಕ್ಕೆ ಸಿಲುಕಿ 1,86,570 ರೂ. ಕಳೆದುಕೊಂಡ ಘಟನೆ ಸೌಕೂರು ಗುಲ್ವಾಡಿ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ.
ಸೌಕೂರಿನ ರೇಣುಕಾ ಗಣೇಶ ದೇವಾಡಿಗ ಹಣ ಕಳೆದುಕೊಂಡವರು. ಅವರು ಕಳೆದ ಅ.16ರಂದು ಮೊಬೈಲ್‌ ಪೋನ್‌ನಲ್ಲಿ ಮೀಶೋ ನೀಡ್‌ ಸ್ಟಾಫ್‌ (‘MEESHO NEED STAFF’) ಎಂಬ ಹೆಸರಿನಲ್ಲಿ ಪಾರ್ಟ್‌ಟೈಮ್‌ ಉದ್ಯೋಗವಿರುವ ಜಾಹೀರಾತನ್ನು ನೋಡಿ ಅದರ ಮೇಲೆ ಕ್ಷಿಕ್‌ ಮಾಡಿದಾಗ ಅವರಿಗೆ ಕೆಲವು ಟಾಸ್ಕ್‌ಗಳನ್ನು ನೀಡಲಾಗಿತ್ತು. ಮೊದಲ ಟಾಸ್ಕ್ ಪೂರ್ಣಗೊಳಿಸಿದ ಬಳಿಕ ಹಣ ನೀಡುವ ಆಮಿಷ ತೋರಿಸಿದ ವಂಚಕರು, ಹಂತ ಹಂತವಾಗಿ ಹೆಚ್ಚಿನ ಹಣ ಗಳಿಸುವ ಅವಕಾಶದ ಹೆಸರಿನಲ್ಲಿ ಮತ್ತಷ್ಟು ಟಾಸ್ಕ್‌ಗಳನ್ನು ನೀಡಿದ್ದಾರೆ.
ಆರಂಭದಲ್ಲಿ ರೇಣುಕಾ ಅವರಿಗೆ 120 ರೂ., ನಂತರ 10,130 ರೂ. ಪಾವತಿಸಿ ವಿಶ್ವಾಸ ಮೂಡಿಸಿದ ವಂಚಕರು. ಬಳಿಕ ಹೆಚ್ಚಿನ ಹಣ ಪಡೆಯುವ ಆಮಿಷವೊಡ್ಡಿ ವಿವಿಧ ಹಂತಗಳಲ್ಲಿ ಹಣ ಹೂಡಿಕೆ ಮಾಡುವಂತೆ ಮಾಡಿದ್ದಾರೆ. ಇದನ್ನು ನಂಬಿದ ಅವರು ಒಟ್ಟು 1,86,570 ರೂ. ಕಳೆದುಕೊಂಡಿದ್ದಾರೆ.
ಈ ಬಗ್ಗೆ ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
