ಕುಂದಾಪ್ರ ಡಾಟ್‌ ಕಾಂ ಸುದ್ದಿ.
ಬೈಂದೂರು: ಇಲ್ಲಿನ ಶಿರೂರು ಗಾಂಧಿ ಮೈದಾನದಲ್ಲಿ ಪಟಾಕಿ ಅಂಗಡಿ ನಡೆಸುತ್ತಿದ್ದ ಯುವಕ ಹಾಗೂ ಆತನ ಸ್ನೇಹಿತರ ಮೇಲೆ ಹಲ್ಲೆ ನಡೆಸಿದ ಆರೋಪದ ಮೇರೆಗೆ 11 ಮಂದಿ ವಿರುದ್ಧ ಬೈಂದೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ನವೆಂಬರ್ 10ರಂದು ಸಂಜೆ ಸುಮಾರು 4.30ರ ವೇಳೆಗೆ ಶಿರೂರು ಗಾಂಧಿ ಮೈದಾನದಲ್ಲಿ ನಡೆದಿದೆ. ಹಡವಿನಕೋಣೆ ಶಿರೂರು ನಿವಾಸಿ ಸಾಯಿರಾಮ್ (22) ಎಂಬವರು ಗಾಂಧಿ ಮೈದಾನದಲ್ಲಿ ಪಟಾಕಿ ಅಂಗಡಿ ತೆರೆದು ವ್ಯಾಪಾರ ಮಾಡುತ್ತಿದ್ದ ಸಂದರ್ಭದಲ್ಲಿ ಆರೋಪಿಗಳಾದ ಶಶಿಕುಮಾರ್ ಮೇಸ್ತ ತಿಮ್ಮಪ್ಪ ಮೇಸ್ತ ಸೌಮ್ಯ ತಿಮ್ಮಪ್ಪ ಮೇಸ್ತ್ರ ದೀಕ್ಷಿತ ಮೇಸ್ತ ನಿತೇಶ್ ತಿಮ್ಮಪ್ಪ ಮೇಸ್ತ ದರ್ಶನ ನಾಗರಾಜ ಮೇಸ್ತ ದೀಪಕ್ ಬಾಲಕೃಷ್ಣ ಮೇಸ್ತ್ರ ಧನುಷ್‌ ಬಾಲಕೃಷ್ಣ ಮೇಸ್ತ ಆಶಿಶ್ ಮೇಸ್ತ ಮಂಜುನಾಥ ನಾಗೇಶ್ ಮೇಸ್ತ ಹಾಗೂ ಶ್ರೀಧರ್ ಜಿ ಎಂಬವರು ಅಲ್ಲಿಗೆ ಬಂದಿದ್ದಾರೆ ಎನ್ನಲಾಗಿದೆ.
ಆರೋಪಿ ಶಶಿಕುಮಾರ್ ತನ್ನ ತಂದೆ ತಿಮ್ಮಪ್ಪ ಮೇಸ್ತ ಹಾಗೂ ತಾಯಿ ಸೌಮ್ಯ ಅವರೊಂದಿಗೆ ಸ್ಥಳಕ್ಕೆ ಆಗಮಿಸಿ, ಸಾಯಿರಾಮ್ ಹಾಗೂ ಅವರ ಸ್ನೇಹಿತರಿಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಇಲ್ಲಿ ಅಂಗಡಿ ನಡೆಸಲು ಬಿಡುವುದಿಲ್ಲ ಎಂದು ಬೆದರಿಕೆ ಹಾಕಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಬಳಿಕ ಅಂಗಡಿಯಲ್ಲಿದ್ದ ಪಟಾಕಿಗಳನ್ನು ಎಸೆದು ಅಂಗಡಿಯೊಳಗಿದ್ದ ಸಾಯಿರಾಮ್ ಹಾಗೂ ಅವರ ಸ್ನೇಹಿತರಾದ ದರ್ಶನ ಮತ್ತು ಪಿಯುಷ್ ಅವರನ್ನು ದೂಡಿ ಹಲ್ಲೆ ನಡೆಸಿದ್ದಾರೆ. ಈ ವೇಳೆ ಅಂಗಡಿಯ ಕೌಂಟರ್‌ನಲ್ಲಿದ್ದ ಟೇಬಲ್ ಹಾಗೂ ದೊಡ್ಡ ಕಲ್ಲಿನಿಂದ ಹಲ್ಲೆ ನಡೆಸಿದ ಪರಿಣಾಮ ಸಾಯಿರಾಮ್ ಅವರ ಕಾಲಿಗೆ ಹಾಗೂ ದರ್ಶನ ಅವರ ಎದೆಗೆ ಗಾಯಗಳಾಗಿದ್ದು ಇತರ ಸ್ನೇಹಿತರಿಗೂ ಗಾಯಗಳಾಗಿವೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.
ಈ ಬಗ್ಗೆ ಬೈಂದೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
